Ты залатую мрою не дагоніш, А толькі словам немату загоіш I выйдзеш зноў – бяз слова і пяра... I ты душу сасьмяглую напоіш Сівой расою з роднага двара. Усё, што знаў, з маленства ты запомніш I калыханкай ўсё, што меў, напоўніш, Нібы Купала, Пушкін ці Саят... Ты ад расколу сьвет не абароніш, Дык дзякуй хоць за тое, што аброніш Шчымлівы і распытлівы пагляд. Ты пасланцоў увагай удастоіш I сілы непасільныя падвоіш, Каб усьміхацца і не ўпасьці – ніц! Правалішся, васкрэсьнеш і прымроіш Глыток вясны з павысахлых расьніц. Старынны ямб нанова перакроіш, Зьнябудзеш тлум, забудзеш новы пройгрыш, Каб дачакацца лепшае з часін. Ўзьляціш да зор, а ямы не абойдзеш, Здалееш страх, а ў шклянцы буру знойдзеш, – Маленькі бог зямлі і вечны сын!
|
|